ભારતની પશ્ચિમે ગુજરાત રાજ્યમાં ખેતીલાયક જમીનો, ડુંગરો, સમુદ્ર અને રણ એવી દુનિયામાં અન્ય કોઈપણ ભુ-પ્રદેશ પાસે નથી તેવી પાંચેય ભૌગોલિક વિશેષતાઓ ધરાવતો પ્રદેશ એટલે આપણો કચ્છ પ્રદેશ. એક તરફ અફાટરણ અને બીજી તરફ વિશાળ દરિયાની વચ્ચે પથરાયેલા આ પ્રદેશમાં રણ અને દરિયાની જેમ કચ્છમાં ડુંગરોનું સૌંદર્ય કંઈ ઓછું નથી.

આ કામણગારા કચ્છની શોભા તો ખરેખર ગામડાં જ છે. આવું જ એક શોભાયમાન ગામ એટલે કચ્છ જિલ્લાના પાટનગર ભુજથી ૪૦ કિ.મી.ના અંતરે અને નખત્રાણા થી ૧૮ કિ.મી. ના અંતરે આવેલું નખત્રાણા તાલુકાનું ભડલી ગામ. આ ગામ અનેક ડુંગરો- ખીણો-કોતરો-નદીઓ અને નયનરમ્ય સીમાડા વચ્ચે શોભાયમાન છે.

કહેવાય છે કે અગાઉ ભડલી ગામ નનાઈ ડુંગર પાસે આવેલ વરસાઈ ખેતર નજીક ત્યારબાદ ભીમભેટની તળેટીમાં અને ત્યારપછી ગોયલામ ખેતર બાજુમાં વસાવવામાં આવ્યું હતું. આ ગામમાં એક પ્રજાપતિ કુંભારની ‘ભડલી’ નામે એક કન્યાને વરસાદના એંધાણ અને જ્યોતિષનું ઊંડુ જ્ઞાન હતું જેના કારણે આ ગામનું નામ ભડલી ગામ પડ્યું એમ કહેવાય છે.

તો ગામની ઉત્તરે દાદા ગરીબનાથનું સ્થાનક આવેલું છે. દર વર્ષે જેઠ મહિનાની અમાસના દિવસે ગરીબનાથ દાદાનો મેળો ભરાય છે. અવશ્ય પધારશોજી.